ТР Дәүләт Советының Мәдәният, фән, мәгариф һәм милли мәсьәләләр буенча комитеты “Татарстан Республикасының 2009 елга һәм 2010, 2011 еллар планлы чорына бюджеты турында” ТР законы проектына карата үзгәрешләр һәм өстәмәләрне карады. Анда мәдәни ихтыяҗны канәгатьләндерү өчен әдәбият-сәнгать оешмаларына билгеле бер күләмдә акча тәгаенләнә. Аерым алганда, “Яңа Гасыр” телевидениесендә балалар каналын булдыру, “Сәхнә”, “Татарстан” журналларын нәшер итү, язучылар, композиторлар берлекләрендәге чыгымнар өчен саллы гына бюджет акчасы билгеләнде.

“Тагын 2 елдан татарның бөек шагыйре Тукайның тууына 125 ел. Тиздән Министрлар кабинеты да бу нисбәттән махсус карар кабул итәчәк”, – дип искәртте комитет рәисе Разил Вәлиев.

Депутатлар Тукайга багышланган махсус сайт булдырырга ниятли. Аның өчен бюджеттан 2 миллион сум акча сорыйлар. “Тукай” сайтында шагыйрьнең иҗаты, биографиясе һәм исеме белән бәйле мәгълүматлар эленәчәк икән. Шул исәптән, замандашлары, Тукай премиясе лауреатлары белән дә таныштырачаклар.

Бүген популяр татар сайтлары юк түгел. Аларны булдыручылар, актив кулланучылар “Тукай” сайты турында ни уйлый икән? Бер сайт булдыру өчен бирелгән 2 миллион сумны күпсенмиләрме?

Данил СӘФӘРОВ, Mатбугат.ру сайты хуҗасы:

– Мондый сумманы ишеткәч, бик гаҗәпләндем. Без дә сайтлар ясыйбыз. Бу бәягә бер иллеләп татар язучысына сайт эшли алыр идек. Татар интернетын күтәрү турында күпме сөйләшәләр - ә гамәлдә киресе эшләнә. 2 миллион сумга бөтен татар интернетын яңа үргә күтәреп булыр иде. Хәзерге татар телле сайтларның күбесе энтузиастлар тарафыннан эшләнгән. Алар, әлбәттә, акча китерми. Бүген ябылыйкмы, иртәгәме, дип җан асрыйлар. Дәүләт шул эшләрне, шул егетләрне күреп алып, аларга ярдәм итәр урынына “2 миллион” дип шаккатыра. Тукай үзе моңа бик гаҗәпләнер иде...

Римзил ВӘЛИ, “Азатлык” радиосының Казан бюросы директоры:

– Татар интернетын көчәйтү – мөһим мәсьәлә. Татарлар.ру белән Матбугат.ру – иң популяр сайтлар. Ә дәүләт тарафыннан булдырылган сайтлар көчле түгел. Белгечләр әйтүенчә, 2 миллион сумга 20ләп сайт эшләргә була. Мин “Тукай” сайты проекты белән таныш түгел. Ул да кирәк. Ләкин үз көчләре белән эшләгән, фидакарь, тыйнак Мөдәррис Каюмов, Тимур Сөләйманов, Данил Сәфәровларга бер тиен дә бирмәүләре гаҗәп. Ул акчаны аерым сайт хуҗаларына бүлеп бирергә тиешләр дип саныйм. Менә аларга нинди ярдәм кирәк икән?

Рузил МӨХЕТДИНОВ, Булмас.ру сайты хуҗасы:

– Сайтны булдыру белән генә эш бетми бит әле. Аны туктатмыйча, яңартып торырга да кирәк. 2 миллион сум зур сумма кебек, тик төрле сайтлар була. Кыйммәтле итеп эшләргә дә мөмкин. “Тукай” сайты популяр булыр шикелле түгел. Бәлки, аны бөтен татар әдәбиятына багышларга кирәктер. Бер сайт милләтне алга җибәрә алмый. Аның өчен 100 татар сайты эшләргә кирәк. Булмас.руны булдыру өчен, 300 мең сум тирәсе китте. Шуның өстенә, еллар буе тутырып, үстереп тору кирәк.

Диләрә АЛМАЗОВА, студент:

– Көне-төне Матбугат.ру белән ВКонтакте.ру сайтларында утырам. Хәзер интернеттан файдаланучыларның 70%ы – яшьләр. Ул “Тукай” сайты кемгә генә кызык булыр икән соң? Аның аудиториясен бөтенләй күз алдына китерә алмыйм. Татфак белән журфак студентлары реферат язганда кулланса гына. Тематикасын бераз киңәйтергә кирәктер. Ә 2 миллион сумга килгәндә... Бюджеттан шулкадәр акча алу кемгәдер кулай, димәк.

Рифат СӘЛАХ, шагыйрь:

– Тукай – безнең маяк бит ул. Аны шулай итеп хөрмәтлибез икән, исемен пропагандалау өчен барысын да эшлик. Ә сумманың күләме күп күренә. Чыннан да, тиешле дәрәҗәдәге сайт эшли алсалар, бу акчаны бирергә кирәк.

Альберт ФАЗЛЫЙ, компьютер белгече:

– 2 миллион?! Акылга сыймый торган нәрсә бит бу. Миңа байтак сайтлар ясарга туры килде, ә менә андыен күргән юк әле. Шәп эчтәлекле, максатлы, иң заманча технологияләр кулланып ясалган сайтлар, күп дигәндә, 200 мең сум тора. 2 миллионга, ким дигәндә, 10 сайт ясарга мөмкин. Гел Тукай турында гына булуын да хупламыйм.